Trump pick Pam Bondi as attorney general afta Matt Gaetz withdraw

 US President-elect Donald Trump don nominate ogbonge goment lawyer Pam Bondi as im new pick for attorney general, hours afta Matt Gaetz withdraw im name from consideration.

Bondi get long track record for law enforcement and im bin serve bifor as Florida attorney general.

Long-time Trump supporter, Bondi na part of im legal team during im first senate impeachment case and she bin also support am for public by showing for court during im hush money court case for New York.

"Pam na goment lawyer for nearly 20 years, wia she bin dey very tough on Violent Criminals, and make di streets safe for Florida Families," Trump tok for one social media post wia im bin announce im choice.

Bondi don dey close to Trump since im 2016 campaign, telling voters for one recent Trump rally say she consider as a "friend".

For 2019, she join im White House to focus on "proactive impeachment messaging", serving both as im legal advisor and defence attorney during im first impeachment – di time wen dem bin acquit am.

She kontinu to be part of Trump legal team for 2020 wen dem make claim say dem tiff election from Trump due to voter fraud.

She also serve on Trump Opioid and Drug Abuse Commission, and more recently, she bin head di legal arm of di America First Policy Institute, one conservative think tank wey former Trump staff members bin establish.

If Senate confam her, Bondi go become di kontri chief law enforcement officer, in charge of justice department more dan 115,000 employees and roughly $45bn (£35.7bn) budget.

She go also play major role in attempting to implement Trump vow to punish im political enemies once im take office.

She be vocal critic of di criminal cases wey dem bring against Trump, as well as special counsel Jack Smith, wey charge Trump for two federal cases.

“For too long, dem don use di partisan Department of Justice as weapon against me and oda Republicans - Not anymore,” Trump write on Thursday evening.

"Pam go refocus di DOJ [Department of Justice] to di purpose wey dem use create am wey be fighting Crime, and Making America Safe Again."

Trump oda plans for di department include ending "using goment as weapon", protecting US borders, dismantling criminal organisations and restoring America "badly-shattered faith and confidence" in di department.

Trump transition team go dey hope say Bondi nomination path go dey easier pass Gaetz own.

Reacting to di announcement, Republican Senator Lindsey Graham predict say Bondi “dem go quick confam her,” calling her selection “grand slam, touchdown, hole in one, ace, hat trick, slam dunk, Olympic gold medal pick.”

News of Bondi nomination come about six hours afta Gaetz say im no go want di high-profile cabinet post, following days of debate over weda to release one congressional report on sexual misconduct allegations against am.

Gaetz nomination shock pipo for Washington plus make pipo for justice department catch cold.

Di justice department bin don investigate am bifor for one sex-trafficking case bifor dem drop di mata.

Announcing im withdrawal, di 41-year-old say di controversy over im potential nomination "bin dey become unfair distraction" to di work of di incoming Trump administration.

In addition to di allegations of sexual misconduct di report of di findings of di investigation wey dem also include accuse of illicit drug use.

Even wit all di gbas-gbos over im nomination, Trump bin still hold onto Gaetz as im bi attend SpaceX rocket launch for Boca Chica, Texas, on Tuesday wit Musk.

We dey ask am weda im dey reconsider di nomination, di president-elect say: "No."

Gaetz bin even get more encouraging news on Wednesday as House Ethics Committee Republicans vote say dem no go release dia investigation on am.

Gaetz bin react by saying e bin be “a great day”. But sign bin still dey say kasala still dey front.

Wen dem ask am how messy di confirmation process fit be, incoming Senate majority leader John Thune, one South Dakota Republican, say di hearing fit dey “on steroids”.

Gaetz seriously deny di claims but say im hope to avoid "useless extended Washington fight" by withdrawing.

Later on Thursday, Gaetz offer im congratulations to Bondi, calling her "stellar selection by President Trump".

"She be tested and trusted lawyer, inspiring leader and champion for all Americans. She go bring di reform wey di DOJ need," im tok.

E no clear if Gaetz, wey bin resign im House seat soon afta Trump nominate am for attorney general, go try to retain im seat now.

Since im resounding election win earlier dis month, Trump don name many of im close supporters to fill high-ranking positions for im administration.